Ulap sa Ilalim ng Buwan

Nakikita kita--ilaw mong nakakasilaw
Gusto kitang mapuntahan mahagip ng iyong ilaw
Sa kagandahan mo--ako'y natutunaw
Gusto kong lumapit upang lalong matanaw

Hangin pakanluran ang tangi kong daan
Sa iyo--umaasang mapunta sa paroroonan
Sinugal ang aking mga hamog
Umaasang mapunta sa ilalim ng bilog

Nararamdaman ko na ang init ng iyong pagmamahal
Pinapakiramdaman ang iyong mga haplos
Sa kagandahan na pinakita mo ngayon,
Ako'y magiging napakagandang unos

May taga-lupang nakasaksi sa atin,
Tayong dalawa ang naghahawak ng kamay
Ang kadiliman ng aking mundo binigyan ng kulay
Kanyang sulat ang magbibigay ng pugay

Ang kadiliman ng ulap at silaw ng buwan,
Sa saglit na sandali--inspirasyon ang pinagmulan
May mga bagay-bagay na sandali lamang mararamdaman
Ngunit sa sandaling hinintay--hindi mo pagsisihan